Kandidati i Partisë Demokratike të Kosovës për kryetar të Komunës së Drenasit, Driton Ajazi, ka drejtuar kritika të ashpra ndaj kryetarit aktual gjatë paraqitjes së tij në emisionin “Info Nata” në Tëvë1. Ai ka thënë se mandati i kryetarit aktual është drejt fundit dhe se më 12 tetor qytetarët e Drenasit do të sjellin një frymë të re në udhëheqjen komunale.
“Shikoni, tani më kryetarit aktual i kanë mbetur vetëm edhe pesë ditë, dhe ai do të njihet si një ish-kryetar nga qytetarët e Drenasit,” deklaroi Ajazi.
Sipas tij, e ardhmja e Drenasit do të ndërtohet mbi një qeverisje të re, me fokus zhvillimin dhe interesin qytetar, në kontrast me qeverisjen aktuale të cilën e akuzoi për abuzim me pushtetin.
“Nga 12 tetori, në Drenas do të fillojë një frymë e re e qeverisjes një qeverisje zhvillimore, me perspektivë, dhe në shërbim të qytetarëve. Përkundër asaj që ka ndodhur deri më tani, ku kryetari aktual ka abuzuar me pushtetin dhe me besimin që ia ka dhënë PDK-ja dhe qytetarët,” shtoi ai.
Ajazi akuzoi kryetarin aktual për sjellje autoritare, korrupsion dhe keqpërdorim të skajshëm të detyrës gjatë mandatit të tij.
“Ka keqpërdorur gjithçka ka abuzuar, ka shantazhuar, ka frikësuar. Ka bërë gjithçka, përveç se të qeverisë si duhet. Fatmirësisht, kësaj keqqeverisjeje po i vjen fundi,” theksoi Ajazi.
Në vazhdim të deklaratës, ai e cilësoi kryetarin aktual si simbol të korrupsionit në Drenas:
“Ai mund të jetë vetëm kampion i hajnësisë, sepse gjatë gjithë qeverisjes së tij e ka përcjellur kjo çështje. Në çdo projekt infrastrukturor, në çdo punësim e hallkë të qeverisjes, ka pasur elemente të abuzimit me pushtetin. Ai ka tentuar ta personalizojë pushtetin dhe të sillet sikur gjithçka rrotullohet rreth tij,” u shpreh Ajazi.
Ajazi tha se çdo projekt i kësaj qeverie është i dyshuar për korrupsion dhe keqmenaxhim.
“Çdo projekt ka dyshime për korrupsion. Është koha që kjo të ndalet. Më 12 tetor, qytetarët e Drenasit do të vendosin për ndryshim,” përfundoi ai.
