Kamboxhia dëshiron që bisedimet e ardhshme ushtarake me Tajlandën të mbahen në Malajzi, mes përleshjeve të vazhdueshme kufitare, ndërsa Tajlanda këmbëngul që takimi të zhvillohet në territorin e saj, raportuan mediat të martën.
Phnom Penh kërkoi që takimi i Komitetit të Përgjithshëm Kufitar (GBC) Kamboxhia-Tajlandë të zhvendoset në Kuala Lumpur, duke përmendur shqetësime sigurie.
Në një letër drejtuar Ministrit të Mbrojtjes së Tajlandës, Gjeneral Nattaphon Narkphanit, Ministrja e Mbrojtjes e Kamboxhias, Gjenerali Tea Seiha, tha: “Për arsye sigurie, për shkak të luftimeve të vazhdueshme përgjatë kufirit, ky takim duhet të mbahet në një vend të sigurt dhe neutral. Në këtë drejtim, Malajzia ka rënë dakord ta presë atë në Kuala Lumpur.”
Tajlanda e hodhi poshtë kërkesën. Ministri i Jashtëm tajlandez Sihasak Phuangketkeow tha se takimi do të zhvillohet të mërkurën në provincën Chanthaburi të Tajlandës, sipas Khaosod, transmeton Anadolu.
Mosmarrëveshja vjen pas një takimi të ministrave të jashtëm të ASEAN-it në Kuala Lumpur të hënën, i përqendruar në tensionet kufitare. Seanca e fundit e GBC-së u mbajt në provincën Koh Kong të Kamboxhias në shtator.
Ndërkohë, përleshjet vazhduan përgjatë kufirit. Tailanda tha se luftimet po vazhdonin në katër provinca verilindore, ndërsa Kamboxhia akuzoi forcat tailandeze se qëlluan me artileri në territorin e saj.
Shifrat e viktimave ndryshojnë, me Tailandën që raporton dhjetëra të vrarë, përfshirë ushtarë dhe civilë, dhe Kamboxhian që thotë se 21 civilë u vranë dhe 83 u plagosën.
Kina u bëri thirrje qytetarëve të saj të shmangin zonat kufitare, duke përmendur një “situatë të rëndë sigurie”.
“Ne i nxisim të dyja palët e përfshira në konflikt të sigurojnë sigurinë dhe të drejtat dhe interesat legjitime të qytetarëve dhe ndërmarrjeve kineze”, tha zëdhënësi i Ministrisë së Jashtme kineze, Lin Jian.
