Deputeti shqiptar në Parlamentin e Serbisë, Shaip Kamberi, ka treguar rreth takimit të delegacionit nga Lugina e Preshevës me senatorët amerikan në Washington. Ai ka thënë se senatorët amerikanë i ka njoftuar për problemet me të cilat përballen shqiptarët në Luginën e Preshevës, raporton teve1.info.
Kamberi ka pasur kërkesë për ndërtimin e një raporti simetrie sa i përket respektimit të të drejtave të komuniteteve në Ballkanin Perëndimor.
“Theksuam problematikat me të cilat ballafaqohen shqiptarët në Luginë, si mungesën e pjesëmarrjes adekuate në institucione shtetërore, pasivizimin e adresave, mosnjohja e diplomave, moszhvillimi ekonomik i rajonit, e temat që kanë të bëjnë me të drejtat tona kolektive. Duke kërkuar nga zyrat e senatorëve të nderuar që çështja e shqiptarëve të Luginës të jetë në agjendën e politikës së jashtme të SHBA-së, e të jetë pjesë e dialogut mes Kosovës dhe Serbisë, që të trajtohen të gjitha çështjet problematike që do të rëndojnë të ardhmen raportet mes dy shteteve”, tha ai përmes një video në Facebook.
Tutje, deputeti shpreson që takime të ketë edhe në ditët e ardhshme që në vazhdimësi të dhurohet një perspektivë tjetër për Luginën e Preshevës.
“Po shpresojmë që këto takime që kishim sot, dhe do të kemi në ditët në vazhdimësi do të japin një perspektivë tjetër Luginës së Preshevës në kuadër të së cilës do të mundësohet realizimi i plotë i të drejtave tona konfrom standardeve që i ka bashkësia ndërkombëtare”, ka deklaruar Kamberi.
