Kamberi në Facebook ka falenderuar të gjithë për mbështetjen nga Shqipëria, Kosova, Mali i zi, Maqedonia e Veriut apo Mërgata.
Në veçanti ai u shprehi falënderim 3 njerëzve që sipas tij e përfaqësojnë sot më së shumti politikisht shtetin e Kosovës.
“Së pari, mirënjohje pafund Kryeministrit të Republikës së Kosovës, z.Albin Kurti.Shumë faleminderit Albin. Është nderim i veçantë që politika jonë e shprehur në parlamentin e Serbisë gëzon mbështetjen e hapur dhe të plotë nga Ju, si Kryetar i Qeverisë dhe si bartës i listës më të votuar në Republikën e Kosovës. Kjo përkrahje shpërfaq përkushtimin Tuaj dhe të Qeverisë që kryesoni për interesat e shqiptarëve të Luginës së Preshevës, të shtypur dhe të diskriminuar nga Republika e Serbisë”, ka shkruar ai.
Përveq Kurtit ai ka falënderuar edhe dy krerët e partive opozitare Memli Krasniqi dhe Lumir Abdixhiku.
“Memli dhe Lumir, pos tjerash, përkrahja juaj e vlefshme nga opozita ishte jo vetëm treguese e pjekurisë suaj politike në dobi të një politike sa më cilësore lokale shqiptare, por edhe në shërbim të ndërtimit të unitetit të Republikës së Kosovës karshi Luginës së Preshevës. Albin, Lumir dhe Memli, përkrahja e Juaj flet edhe për konsensusin aktual pozitë-opozitë në Kosovë për ushtrimin e një politikë të denjë shqiptare në Luginën e Preshevës të bashkërenduar midis nesh”, shtoi ai.
Tutje Kamberi tha se si deputet nga Lugina e Preshevës, me padurim pret të punojnë bashkërisht në këtë drejtim, dhe siç tha ai Lugina e Preshevës do të bashkërendohet me Kosovën dhe Shqipërinë.
Kjo sipas tij është e drejtë demokratike./teve1.info/.
