Ferat Xhaka, familjar i futbollistit Granit Xhaka dhe ish-ushtar i Ushtrisë Çlirimtare të Kosovës, ka udhëtuar drejt Hagës për të qenë i pranishëm në ditën e shpalljes së vendimit për ish-krerët e UÇK-së.
Në një intervistë për Tëvë1 nga Haga, Xhaka ka treguar për udhëtimin e tij të gjatë dhe dëshirën për të qenë pranë ish-krerëve të UÇK-së në këtë ditë.
“Dje jam ardhë 12 orë të natës nga shtëpia, kam mbërritë diku ka ora 3 në Tiranë, në ora 6 e kam pas fluturimin për Bruksel edhe kam mbërritë në ora 9 në Bruksel. Edhe kam ardhë këtu dhe pata qef me hi në dhomën e dëgjimit, por nuk mujtëm me mbrri. Jo, kam ardhë me i pritë e me i marrë e me i çu prej shpie, kysmet”, ka thënë ai.
Xhaka ka rrëfyer edhe për plagosjen e tij gjatë luftës në Kosovë, duke treguar se ende mban pasojat e asaj kohe.
“Jam invalid i luftës, jam plagosë në fshatin Sordoll. M’i ka thy këmbët, i kam ende 17 copa të vogla kështu. Kur po ftohet koha, edhe ma mpin krejt trupin, por mbasi kam shpëtuar mirë edhe kemi qenë 10 veta dhe komandant e kemi pasur Nuredin Ibishin, Komandant Lekën. Ai ditë është plagosur edhe unë mbeta i plagosur atë ditë. Më morën shokët edhe shpëtoj Leka edhe unë”, ka deklaruar Xhaka.
Duke folur për vendimin që pritet të shpallet, ish-ushtari i UÇK-së tha se është pothuajse i bindur se verdikti do të jetë lirues për katër ish-krerët e UÇK-së.
“Unë jam i bindur 99% se ka me ardhë përfundimi lirues. Edhe me ditë që nuk vjen lirues, unë nuk di se si mundem me përshkru atë dhimbje, jo veç për mua, po ish dashur për të gjithë popullin e Kosovës. Ish kanë i dhimbshëm ky gjykim”, ka thënë ai.
Xhaka ka kritikuar edhe, siç i cilësoi ai, deklaratat që sipas tij dëmtojnë vlerat e luftës së UÇK-së.
“Me emër të Zotit kena me i marrë me i çu prej shpie bashkë. Në sa i përket UÇK-së, ku po munden me i gjet ato fjalë, ku po munden me i gjet me qitë të tyren para popullit, me thanë ky është shpiun, ai është hajn. Qysh s’po munden me prekë kokën edhe logjikën se çka janë tu thonë. Edhe këta shumica e popullit tonë janë tu e degradu ushtrinë edhe tu i hupë vlerat e luftës, sikur me i qitë në bërllog”, është shprehur ai.
Në fund, Xhaka ka treguar se mezi ka gjetur akomodim në Hagë, ndërsa tha se ka kaluar rreth 15 orë pa gjumë vetëm për të qenë aty dhe për ta pritur ditën e vendimit.
“Nuk jam akomodu ende, ishin të zëna të gjitha hotelet. Unë qe 15 e 15 orë jam pa gjumë edhe tek e fundit flej edhe në karrika, vetëm që edhe me pritë ditën e nesërme këtu”, ka thënë Ferat Xhaka.
