Policia e Kosovës ka njoftuar se sot, më 8 korrik 2026, do të ketë ndërprerje të përkohshme të qarkullimit në disa segmente rrugore për shkak të kalimit transit të Presidentit të Republikës së Shqipërisë, Bajram Begaj.
Sipas njoftimit, policia ka ndërmarrë të gjitha masat e nevojshme operative dhe ka angazhuar njësitë përkatëse për të garantuar sigurinë e eskortës presidenciale, si dhe zhvillimin normal të lëvizjes përgjatë itinerarit të planifikuar.
Ndërprerjet e përkohshme të trafikut do të realizohen në intervale të shkurtra kohore në segmentet rrugore nga Pika e Kalimit Kufitar Vërmicë deri te Pika e Kalimit Kufitar Dheu i Bardhë, si gjatë hyrjes ashtu edhe gjatë kthimit të delegacionit.
Policia ka bërë të ditur se sipas nevojës, trafiku mund të riorientohet në rrugë alternative për të shmangur bllokimet dhe për të lehtësuar qarkullimin.
Në fund, Policia e Kosovës ka falënderuar qytetarët dhe të gjithë pjesëmarrësit në trafik për mirëkuptimin dhe bashkëpunimin gjatë zbatimit të këtyre masave të përkohshme./teve1.info/
