Kadrijaj tha se kryeministri i Kosovës, Albin Kurti ka thënë se deputetët e mazhorancës duhet t’i përkrahin politikat e Qeverisë ose nuk do të jenë pjesë e listave zgjedhore.
“Ne e shohim se deputetët e mazhornacës kanë qëndrimet e Qeverisë sepse në fakt ata që nuk mendojnë si Qeveria ose largohen nga partia ose ne e kemi parë qe zoti Kurti i ka kërcënuar në një intervistë se deputetët e mazhorancës duhet t’i përkrahin politikat Qeverisë përndryshe nëse nuk i përkrahin më nuk do të jenë as pjesë e listave zgjedhore dhe në këtë formë ndoshta edhe deputetët ndihen të kërcënuar dhe që dashtë e pa dashtë duhet t’i përkrahin këto politika të Qeverisë”, tha ajo.
Kadrijaj në emisionin “Info Nata” në Tëvë1 tha se Aleanca për Ardhmërinë e Kosovës nuk ka kërkuar që të shkarkohet Qeveria, mirëpo ka tentuar t’i tregojë Qeverisë se pushteti nuk është lluks por edhe përgjegjësi.
“Ne nuk kemi kërkuar që Qeveria të shkarkohet, përkundrazi për të vazhduar në të mirë të shtetit. Ne e kemi përkrahur si opozitë dhe jemi deklaruar se do e përkrahim edhe për procesin e dialogut dhe nuk kemi inicuar ndonjë mocion mosbesimi për Qeverinë mirëpo ne po tenojmë t’i tregojmë qeverisë se pushteti nuk është vetëm lluks po është edhe përgjegjësi”, deklaroi Kadrijaj.
Tutje Kadrijaj tha se AAK-ja do ta përkrahë Asociacionin por vetëm sipas verdiktit të Gjykatës Kushtetuese./Teve1.info/
