Deputetja e Aleancës për Ardhmërinë e Kosovës (AAK), Time Kadrijaj deklaroi se qëndrimi i kësaj partie nuk ka ndryshuar sa i përket votimit të kryeparlamentarit. Ajo tha se nuk janë të informuar nëse sërish sot propozimi i Lëvizjes Vetëvendosje do të jetë emri i Albulena Haxhiut.
Para fillimit të seancës – tentativës së shtatë për konstitutimin e plotë të legjislaturës së nëntë, Kadrijaj u shpreh se nuk kanë marrë asnjë ftesë nga LVV-ja për takim konsultativ.
“Ne nuk po presim asgjë, s’kemi pasur asnjë ftesë sikur kanë aluduar në fillimet e para se duhet të koordinohet, gjë që nuk duhet me u koordinu. Kjo shumica duhet t’i ketë votat, kjo klasë politike duhet të angazhohet që tenton ta marrë qeverinë, duhet të angazhohet që të sigurojë shumicën e thjesht prej 61 votave. Ne nuk kemi parë ndonjë angazhim, së paku se kemi parë publikisht, nuk kemi pasur ndonjë ftesë. Nuk e dimë a do të jetë kandidati i njëjtë apo do të ndryshojë, megjithatë qëndrimi jonë është i njëjtë nuk do ta votojmë kandidaten për kryeparlamentare”, deklaroi Kadrijaj.
