Profesori i ekonomisë, Mustafë Kadriaj ka thënë se rritja e tarifave të energjisë elektrike nga Zyra e Rregullatorit për Energji (ZRRE) do të ketë efekt zingjiror deri te konsumatori pasi do të paguajnë më shtrenjtë.
Kadriaj të mërkurën në emisionin “Këndi i Debatit” është shprehur se edhe bizneset do të detyrohen të rrisin çmimet sepse sipas tij kështu e dikton ekonomia e lirë.
“Ky shtrenjtim i energjisë elektrike e ka efektin e parë që drejtëpërdrejt si konsumatorë e paguajmë me këtë ngritje të çmimit, efekti i dytë është që bizneset detyrimisht kanë me i rrit çmimet sepse duhet me qëndru në treg sepse kështu ta dikton ekonomia e lirë dhe në momentin që këta i rrisin çmimet rëndohet shporta e konsumit dhe shërbimet në përgjithësi edhe pra do të ketë efekt zingjiror”, ka thënë ai.
Ai e quajti krizën energjetike artificiale, duke thënë se po të ishte e natyrshme dhe e sinqertë, do të mbështeste vendimet e ZRrE-së dhe Qeverisë.
“Është krizë artificiale se të ishte e natyrshme dhe e sinqertë unë do të isha pro vendimit të të ZRrE-së dhe pro vendimit të Qeverisë edhe besoj që dhe bizneset do të ishin pro sikur të ngrihej një alarm që kemi nevojë për një stabiliment të ri të energjisë elektrike një Kosovë të re që me kriju ato kapacitete që edhe me e furnizu tregun vendor dhe mundësisht për treg të jashtëm”, është shprehur Kadriaj.
