Festim Kabashi nga LDK-ja, në emisionin “Ditari” në Tëvë1, ka komentuar situatën rreth procesit të moscertifikimit të Listës Serbe, duke e cilësuar atë si një proces të keqmenaxhuar nga qeveria.
Kabashi tha se partitë politike në vend kanë qenë vazhdimisht kundër certifikimit të Listës Serbe, mirëpo sipas tij, Qeveria dhe Lëvizja Vetëvendosje po e përdorin këtë temë për përfitime politike në prag të zgjedhjeve.
“Angazhimi im kryesor do të jetë që qytetari të mos mashtrohet. Gjatë gjithë ditës kemi parë reagime për moscertifikimin apo certifikimin e Listës Serbe. Ky është një cirk i llojit të vet që po përsëritet, dhe rezultati po del i njëjtë. E vetmja gjë që po prodhon ky proces është dëmtimi i raporteve me aleatët tanë kryesorë, SHBA-në,” tha Kabashi.
Ai shtoi se të gjitha subjektet politike kanë qenë kundër certifikimit të Listës Serbe, jo vetëm Vetëvendosje.
“Të gjitha subjektet politike janë kundër certifikimit të Listës Serbe, jo vetëm VV-ja. Mirëpo VV-ja nuk po e bën si duhet këtë proces. Po e shndërron në cirk dhe në propagandë për të mashtruar në prag të zgjedhjeve,” tha ai.
Kabashi theksoi se nëse Lista Serbe nuk duhet të certifikohet, atëherë institucionet është dashur të veprojnë më herët.
“Nëse Lista Serbe nuk duhet të certifikohet për atë që ka bërë më herët, unë mendoj se është dashur të merren masa më herët, jo tash,” deklaroi ai.
