Deputetja e Aleancës për Ardhmërinë e Kosovës (AAK), Time Kadrijaj, ka deklaruar se aktgjykimi i Gjykatës Kushtetuese ka lënë hapësirë për interpretime.
Kadrijaj në emisioni “Këndi i Debatit” në Tëvë1, tha se vendimi i Kushtetueses kërkon bashkëpunim politik dhe konsensus ndërmjet grupeve parlamentare për të kapërcyer bllokadën institucionale që ka përfshirë Kosovën pas zgjedhjeve.
“Gjykata Kushtetuese ka lënë hapësira për interpretim, sepse ne në bazë të kërkesës që kemi parashtruar e në bazë të zhvillimeve që kanë ndodhur, kërkesa jonë ka qenë që të interpretohet kalimi nga votimi i hapur në votim të mbyllur dhe kemi marrur një preferencë që të veprohet sipas praktikave të mëhershme”, deklaroi ajo.
Ajo theksoi se në përfundimet e aktgjykimit theksohet qartë nevoja për bashkëpunim dhe konsension ndërpartiak për të zhbllokuar ngërçin politik.
“Në rastin e tillë, nëse Kurti nuk dëshiron me bashkëpunua ose nuk dëshiron ta ketë një koalicion me një parti politike për zgjidhjen e ngërçit, është obligim i VV-së me i siguruar 61 vota,” shtoi ajo.
Duke iu referuar aktgjykimit të vitit 2014 të Kushtetueses, Kadrijaj rikujtoi se megjithëse partisë fituese i njihet e drejta për të propozuar kandidatin për kryetar Kuvendi, ajo nuk ka të drejtë të bllokojë procesin e konstituimit.
“Thuhet se i takon partisë më të madhe për me propozuar deputetin për kryeparlamentar, por më poshtë shkruan se nuk e ka të drejtën e bllokimit të konstituimit të Kuvendit”, nënvizoi ajo.
Situata politike në vend mbetet e tensionuar, ndërsa subjektet parlamentare nuk kanë arritur ende të dakordohen për ndonjë marrëveshje që do të mundësonte konstituimin e Kuvendit dhe formimin e institucioneve të reja./teve1.info/
