Skuadra e Juventusit po punon në heshtje për të siguruar shërbimet e Granit Xhakës, kanë raportuar mediumet italiane.
Bëhet e ditur se Juventusi ka bërë gati ofertën dhe po synon ta bind Sunderlandin në shitjen e mesfushorit shqiptar në afatin kalimtar të janarit.
33-vjeçari po shihet si përforcim i rëndësishëm te Juventusi, duke pasur parasysh lidershipin e tij që po e tregon me fanellën e Sunderlandit në Premier League.
Xhaka vlerësohet lojtari kryesor i Sunderlandit këtë sezon pasi i është besuar edhe shiriti i kapitenit kurse me ekipin anglez ka kontratë deri në vitin 2028.
Thuhet se Juventusi, fillimisht do të ofrojë 15 milionë euro për kartonin e Xhakës, duke lënë të hapur mundësinë e ofrimit deri në 20 milionë euro nëse Sunderlandi reziston.
Xhaka para fillimit të këtij sezoni iu bashkua Sunderlandit nga Bayer Leverkuseni për 15 milionë euro, ndërsa në 12 paraqitje në kampionatin anglez ka 1 gol dhe 3 asistime.
