Julian Assange, themeluesi i WikiLeaks, tërhoqi vëmendjen e publikut të martën, kur u shfaq në tapetin e kuq të Festivalit të Filmit në Kanë, i veshur me një bluzë të bardhë që mbante emrat e 4,986 fëmijëve palestinezë nën 5 vjeç, të vrarë në Gaza.
Kjo ishte paraqitja e tij e parë publike pas lirimit nga një burg britanik vitin e kaluar, shkruan Anadoly.
Assange e shfrytëzoi këtë ngjarje me profil të lartë për të tërhequr vëmendjen ndaj pasojave të luftës së Izraelit në Gaza, duke mbajtur një tabelë në shpinë që thoshte: “Ndalo Izraelin”. Ai ishte në Kanë për të mbështetur filmin “The Six Billion Dollar Man”, një dokumentar i ri për jetën e tij, i drejtuar nga regjisori amerikan Eugene Jarecki.
Ky film, fitues i çmimit Golden Globe, përshkruan shpërndarjen e dokumenteve të klasifikuara nga WikiLeaks, pasojat politike që pasuan dhe fushatën ndërkombëtare që çoi në lirimin e Assange në vitin 2024.
Paraqitja e tij ndodhi pothuajse një vit pas daljes nga burgu i sigurisë së lartë Belmarsh në Londër, pas një marrëveshjeje për pranimin e fajësisë me qeverinë amerikane. Assange kishte kaluar pesë vjet në burg duke luftuar ekstradimin dhe shtatë të tjera brenda Ambasadës së Ekuadorit në Londër, ku kërkonte azil.
