Kandidati i Lëvizjes Vetëvendosje (LVV) për kryetar të komunës së Junikut, Jetmir Tofaj, ka folur në emisionin “Ditari” për takimet që ka zhvilluar me qytetarët që nga shpallja e kandidaturës së tij.
Tofaj tha se gjatë këtyre takimeve janë identifikuar problemet kryesore me të cilat përballen qytetarët, duke vërejtur një dëshirë të madhe për ndryshim dhe energji të reja.
“Patjetër që kam filluar takimet me qytetarët që nga momenti kur kam shpallur kandidaturën time. Edhe në secilën lagje kemi identifikuar ato problemet që ballafaqohen qytetarët, ku kemi vërejtur një dispozitim të hatashëm për ndryshim, sepse ata kanë një vullnet për ndryshim edhe për energji të reja,” tha Tofaj.
Ai gjithashtu kritikoi disa nga premtimet e kryetarit aktual të komunës, duke theksuar se gjendja faktike është ndryshe nga ajo që është paraqitur.
“Për kryetarin aktual në Junik, shumë premtime pasqyrohen sikur të përfunduara, por gjendja faktike tregon krejtësisht ndryshe. Unë dua të fokusohem tek disa prej premtimeve: ku 30% e drejtorive të komunës udhëhiqen nga gratë – kjo nuk është plotësisht e përfunduar, është pjesërisht, edhe pse paraqitet si e përfunduar. Po ashtu, skema stimuluse për mësimdhënës nuk është e përfunduar nëse bisedojmë me qytetarët, si dhe shumë të tjera që nuk janë përfunduar,” u shpreh Tofaj.
Tofaj theksoi se prioriteti i tij është të adresojë këto çështje dhe të sjellë ndryshime të prekshme për komunitetin e Junikut.
