Tash e disa vite jeton mes zhurmave të këtyre makinerive të rënda
Është ky Nexhmedin Mjekiqi nga fshati Shipitullë e Obiliqit.
Shtëpia e këtij të fundit, ndodhet vetëm disa metra larg mihjes aktive në këtë fshat.
Nga këtu fillon zona në pronësi të Korporatës Energjetike të Kosovës, nga ku nxirret qymyr për nevojat e termocentraleve.
Por, jo të gjitha pronat në këtë fshat u shpronësuan.
Në mesin e atyre që nuk kaloi në pronësi të KEK, është edhe shtëpia e Nexhmedin Mjekiqit.
“Mirëpo kur dalim të shpronësimi i shtëpive, mesi i fshatit ka mbetur pa u shpronësuar, fillimi i fshatit dhe fundi i fshatit është shpronësuar. Na kanë mbetur ngastrat buzë shiritave , kjo është e papranueshme është e dëmshme”, shprehet Nexhmedin Mjekiqi – banor i fshatit.
Kjo gjendje, Mjekiqi thotë se ua ka vështirësuar jetesën në këtë fshat.
“Ne nuk kemi marrë sqarime asnjëherë për këto rrugë për këto procese . Ekspertët të cilët i kanë planifikua këto veprime i dinë këto veprime më mirë. Këto pasuri neve na kanë mbetur të pavlefshme. Çka do të thotë për ty shtëpia më të mbet pasuri e vdekur më u detyru me u largu. Këtu kemi telashe edhe me ujin kemi telashe me ambientin mirëpo tash na ka vështirësuar situata edhe me qarkullim, për një inkesion duhet me bo kilometra e kilometra”, thotë Mjekiqi.
E përveç Mjekiqit, ne afërsi të kësaj mihje jetojnë edhe disa familje tjera.
Në mesin e tyre është edhe familja Mjeku
Kryefamiljari, Ferkiu, thotë se procesi i shpronësimit të pronave për nevoja të KEK-ut, ka sjell përcarje të mëdha në Shpitullë.
“Neve as nuk po na lejojnë me ndërtu e as nuk po na shpronësojnë e gjysmën e fshatit atje në mal i kanë shpronësu këtu para bagerit në vijë ajror nuk janë as 100 metra nuk na kanë shpronësuar. Ka bërë padrejtësi shumë plus e ka bërë përçarjen brenda katundit kemi telashe me katund me vllaznillak na kanë bërë përçarje të madhe”, thotë Ferki Mjeku.
E fuqia e makinerive vërehet edhe në shkollën e fshatit e cila është plasaritur dhe që disa vite nuk është funksionale.
Madje që nga muaj maj i vitit 2024 është mbyllur edhe rruga që lidh fshatin me Obiliqin.
E pikërisht për këto shpronësime të mërkurën Prokuroria Speciale ka intervistuar në cilësinë e të pandehurit, kryetarin e Obiliqit, Halil Thaçin.
Krejt kjo, sipas PSRK-së, nën dyshimet se i njëjti ka ushtruar ndikim në këto shpronësime.
