Kryeministri holandez, Mark Rutte dha dorëheqje pas rënies dramatike të qeverisë së koalicionit të tij.
Udhëheqësit e koalicionit katër partish ishin mbyllur në takime natën vonë të mërkurën dhe të enjten në një përpjekje për të arritur një marrëveshje mbi politikën e migracionit.
Megjithatë, Rutte, i cili është kryeministri më jetëgjatë i vendit, njoftoi se dallimet midis partnerëve të koalicionit ishin “të papajtueshme”.
“Kjo është arsyeja pse unë do t’i ofroj menjëherë mbretit dorëheqjen e të gjithë kabinetit me shkrim”, tha ai në Hagë të premten mbrëma.
“Nuk është sekret që partnerët e koalicionit kanë pikëpamje shumë të ndryshme për politikën e migracionit. Dhe sot, për fat të keq, ne duhet të nxjerrim përfundimin se ato dallime janë të papajtueshme.”, shtoi ai, shkruan SkyNews, përcjell KosovaPress.
Rutte dhe qeveria e tij do të qëndrojnë në detyrë derisa të zgjidhet një koalicion i ri qeverisës – megjithëse partitë opozitare kanë bërë thirrje për zgjedhje të menjëhershme.
