Aktorja e famshme e Hollywood-it, Jennifer Aniston, e ka bërë zyrtare lidhjen e saj me Jim Curtis.
Në profilin e saj në “Instagram”, 56-vjeçarja publikoi një foto bardh e zi ku shihet duke përqafuar partnerin e saj, trajnerin e mirëqenies dhe hipnotistin.
Ndërkohë krahas këtij imazhi, aktorja e serialit “Friends”, bëri edhe një dedikim të ëmbël:
“Gëzuar ditëlindjen, i dashuri im. I çmuar” dhe postimin e mbylli me një zemër të kuqe.
Kjo është hera e parë që Jennifer e bën publike një lidhje që prej ndarjes nga bashkëshorti i saj, aktori Justin Theroux, në vitin 2017.
Në foto, dyshja shfaqen të qeshur dhe të afërt, ndërsa fansat dhe miqtë e saj kanë reaguar menjëherë. Aktorja e “Real Housewives”, Kyle Richards, i ka lënë dy zemra në komente, ndërsa modelja Poppy Delevingne ka shkruar “Parajsë”.
Lidhja e Aniston me Curtis ishte përfolur që prej verës, kur u fotografuan gjatë një pushimi romantik në Mallorca. Më pas, ata janë parë edhe në një darkë dyshe në restorantin “Nobu” në Malibu, Kaliforni.
Sipas burimeve për “Us Weekly”, “ata po përpiqen të mbajnë gjithçka shumë private, por kalojnë shumë kohë bashkë. Janë të lumtur dhe të përkushtuar ndaj njëri-tjetrit”.
