Derisa po i afrohemi fundit të Superligës në futboll dhe dilemat për titullin e kampionit e të vendit të dytë duket se kanë përfunduar, java e 32-të e ligës elite pritet të qartësojë shumëçka rreth mbijetesës dhe pozitave të tjera për garat evropiane.
Katër duelet e fundjavës janë të rëndësishme për të përcaktuar pozitat e fundit të tabelës, e në përgjithësi barazhit, aty ku në garë janë pesë skuadra dhe dallimi është vetëm pesë pikë.
Përballja kryesore do të jetë ajo ndërmjet Suharekës vendëse dhe Ferizajt.
Ekipi i ri në Superligë, nuk ka gjetur rehati në javët e fundit dhe është zhytur në pozitën e parafundit, me 33 pikë, shtatë më pak se pozita e tetë që i siguron vetëm barazhin. Në pesë javët e fundit, Suhareka ka vetëm një pikë, katër humbje të pësuara, duke pranuar 14 gola dhe duke realizuar vetëm tri herë.
Në anën tjetër përballë ka Ferizajn që me 45 pikë dhe në pozitën e katërt, skuadra e Arsim Abazit është më afër Evropës, pas formës së jashtëzakonshme në pesë katër ndeshjet e fundit, me tri fitore e një barazim.
Kjo ndeshje luhet të dielën nga ora 15:00, në Suharekë, dhe mund të jetë vendimtare për ekipin vendës, sidomos në rast të humbjes.
Të shtunën, zhvillohen dy ndeshje në program. Nga ora 15:00 Malisheva është nikoqire e Dukagjinit, ndërsa nga ora 20:00, Prishtina e pret Ballkanin.
Të dielën, ndeshja tjetër e madhe e kësaj xhiroje luhet në Gjilan, aty ku Drita e pret Llapin, në duelin në nis nga ora 15:00.
