Ka nisur edicioni i 15-të i “Java e Albanologjisë”, që organizohet nga Instituti Albanologjik. Prezent në hapjen e këtij aktiviteti ishte edhe kryeministri Kurti, që theksoi rëndësinë e dijes albanologjike ndër shekuj për shqiptarët.
Nga e hëna, filloi “Java e Albanologjisë”, nën organizimin e Institutit Albanologjik.
Kjo ngjarje llogaritet të jetë ndër më të mëdhatë që zhvillohen nën patronatin e këtij institucioni.
“Themelimi i këtij aktiviteti shkencor është bërë sipas parimit që secila nga pesë degët e Institutit të Albanologjisë të organizojë nga një sesion shkencor. Temat e sesioneve caktohen në fillim të vitit, përfshirë planin e punës. Gjithashtu Instituti Albanologjik mund të organizojë edhe konferenca edhe me një temë bosht për të gjitha disiplinat albanologjike, sidomos me rastin e përvjetorëve të rëndësishme që ndërlidhen me të kaluarën dhe kulturën shqiptare. Përveç punonjësve shkencor të Institutit Albanologjik ftohen edhe albanologë të dëshmuar nga bota dhe trojet etnike shqiptare”, tha Lulwzim Lajçi nga Instituti Albanologjik .
Në nisjen e këtij aktiviteti, prezent ishte edhe kryeministri i Kosovës, Albin Kurti.
Sipas tij, dija fillestare albanologjike, ndikoi në zgjimin kombëtar të shqiptarëve ndër shekuj.
“Në termin e albanologjisë janë përmbledhur dijet nga disa disiplina shkencore, siç kanë të bëjnë me gjenezën, historinë dhe kulturën e kombit shqiptar. Si e tillë ajo ka nisur si interesim i shkencëtarëve të huajë me çështjen shqiptare. Për ta çështja shqiptare kishte të bënte me përcaktimin shkencor të origjinës dhe historinë e kombit shqiptar dhe të gjuhës së tij, si dhe vendet që kjo e fundit zinte në mozaikun e gjuhëve indoevropiane. Dija fillestare albanologjike, ajo e shekullit 18 dhe 19 ndihmoi shumë në zgjimin kombëtar të shqiptarëve në gjysmën e dytë të shekullit 19”, tha Kurti.
Ai potencoi edhe rritjen e numrit të studentëve në drejtimet e gjuhësisë dhe letërsisë.
“Para dy muajve morëm edhe vendimin për të ndarë bursa bachelor dhe master për studentë që vijojnë programet Gjuhë Shqipe dhe Letërsi Shqipe në Fakultetin e Filologjisë në Universitetin e Prishtinës. Falë kësaj në këtë vit akademik numri i aplikimeve në programin Gjuhë Shqipe nga 20 sa ishte vitin e kaluar tash është 105, në Letërsi Shqipe nga 6 sa ishte vitin e kaluar tash është 79”, u shpreh Kurti.
Ky është edicioni i 15-të i “Java e Albanologjisë”.
