Kosova mund të përballet me krizën e formimit të institucioneve të reja deri në vitin e ardhshëm kur është koha e zgjedhjes së presidentit të ri.
Kështu ka vlerësuar analisti politik, Shemsi Jashari.
Ai ka thënë se fokusi i partive tash do të jetë te zgjedhjet e reja lokale që do të mbahen në tetor.
Jashari në emisionin “Ditari” në Tëvë 1, ka thënë se në këtë kohë asnjë parti nuk dëshiron të bëjë kompromise nga frika se mund të ketë ndikim te zgjedhjet lokale.
“Tashmë kemi hyrë në kohën kur është shpall data e zgjedhjeve lokale dhe i gjithë fokusi i partive politike do të jetë në nivelin e lokal dhe asnjërës prej subjekteve politike nuk i konvenon që në këtë situatë të bëjnë ndonjë kompromis që të ulen dhe gjejnë zgjidhje për të formuar Qeverinë. Kam frikë se e njëjta do të ndodhë deri në vitin e ardhshëm kur të përballemi me zgjedhjen e presidentit”, ka thënë Jashari.
Ai ka thënë se me këtë qasje deputetët po përbuzin mandatin e dhënë nga qytetarët dhe se liderët politik do të mbahen mend për dëmin që po ja shkaktojnë vendit.
“Është e paarsyeshme, një përbuzje e mandatit qytetar që e kanë marrë këta deputetë edhe liderët politik do të mbahen në mend për këtë dëm që po i bëjnë Kosovës, me theks të veçantë z.Kurti i cili është celësi për ta zhbllokuar këtë proces”, ka thënë ai.
Të mërkurën ka dështuar edhe përpjekja e 30-të e konstituimit të Kuvendit.
