Kryetari i Shoqatës së Familjarëve të Dëshmorëve të UÇK-së, Xhavit Jashari, ka folur për listat e veteranëve dhe qëndrimin e kryeministrit të Kosovës, Albin Kurti karshi tyre.
Sipas Jasharit, kryeministri Kurti ka dështuar në realizimin e premtimeve të dhëna gjatë fushatës dhe ka zgjedhur atakimin e veteranëve në mënyrë që Qeveria të bjerë sa më lehtë.
“Këto janë lista që janë bërë nga ata që e kanë udhëhequr luftën, nga komandantët të cilët janë i vetmi institucion që mund ta bëjë verifikimin e këtyre kategorive në zinxhirin komandues. Por mendimi im është që këtu paaftësia dhe pamundësia e qëndrimit të një kryeministri karshi gjithë këtyre problemeve, në radhë të parë të bisedimeve, pastaj mosgatishmëria e bashkëpunimit të këtij kryeministri në nivelin e duhur me institucionet ndërkombëtare e në këtë rast me ShBA-në, pastaj ky kryeministër ka dhënë shumë premtime dhe pazotësia e tij për t’i zgjidhur gjithë ato probleme, për t’i realizuar të gjithë ato premtime që i ka dhënë gjatë një fushate ku duke i bërë këto premtime ka ardhur në shprehje ku edhe qytetari ja ka dhanë votën dhe sot mendoj që e ka zgjedhur rrugën që rënia më e lehtë e kësaj Qeverie është t’i atakojë kategoritë e luftës”, ka thënë Jashari.
Jashari ka shtuar se Kurti e di që nëse prek në dinjitetin e veteranëve nuk do të lejohet tutje.
“Ai e din që ne kemi qenë faktorë stabiliteti pas përfundimit të luftës me të gjithë padrejtësitë që ju kanë bërë kategorive të dala nga lufta, komandantëve, ushtarëve qoftë në procese gjyqësore, madje kjo luftë është faktuar e drejtë e pastër, se ka qenë e drejtë dhe e pastër për të ardhur deri këtu, deri edhe në Tribunalin e Hagës ku ka qenë Haradinaj, Limaj e të tjerët. Mendim i imi është që e din se nëse prek në dinjitetin e këtyre vlerave nuk lejohet tutje. I kemi bërë të ditur kryeministrit dhe kësaj qeverie që nuk do të lejojmë tutje. Mendim i imi është që këto i përdor që ta ketë edhe një arsye që nëse shkojmë në zgjedhje…Të gjitha ato spekulime që i bën edhe me shifrat dhe numrat e veteranëve që janë të pasakta, mendoj që qëllimin e ka deri diku edhe këtu”, ka shtuar Jashari në Ditari në Tëvë 1.
