Ardon Jashari, gradualisht po shndërrohet në top-mesfushor të futbollit evropian.
E dëshmia më e mirë për këtë, është ndeshja e së martës mbrëma ku Jashari ndihmoi Bruggen të kualifikohet në 1/8 e finales të Ligës së Kampionëve.
Brugge fitoi 3:1 në udhëtim tek Atalanta, ekip të cilin e eliminoi në fazën e play-offit me rezultatin e përgjithshëm 5:2.
Pikërisht, në duelin e luajtur në Bergamo, Jashari shkëlqeu pasi u shpall lojtari i ndeshjes.
Në përshkrimin e ekspertëve të UEFA-s për 22-vjeçarin, thuhet se Jashari “ishte motori i ekipit pasi u paraqit kudo në mbrojtje dhe pati vrapime të rëndësishme në sulm”.
Po ashtu, Jashari u përfshi në dy golat e shënuar nga Brugge kurse për kualifikimin e ekipit të tij në 1/8 e finales, mesfushori tha se është shumë i lumtur.
U shpreh i nderuar edhe me çmimin e fituar nga UEFA si lojtar i ndeshjes, ndërsa shtoi se është gati për kundërshtarin e radhës në këtë garë.
Jashari iu bashkua Brugget vitin e shkuar nga Luzerni dhe këtë sezon ka 2 gola e 4 asistime në 35 paraqitje.
Ai është pjesë e Kombëtares së Zvicrës, ndërsa së fundmi ka tërhequr vëmendjen e top skuadrave italiane, përfshirë këtu Juventusin e Napolin.
