Kryetari i Shoqatës së Familjarëve të Dëshmorëve të UÇK-së, Xhavit Jashari, ka thënë se sot kanë festuar Ditën e Veteranit, por jo me Qeverinë Kurti.
Ai tha se kjo Qeveri dhe kryeministri Kurti e ka dëshmuar veten që janë anti-UÇK dhe siç tha ai nuk kanë bashkëpunim fare me ta sepse nuk i kanë mbajtur fjalët në takim të parë.
Tutje ai ka deklaruar se një bashkëpunim i tillë nuk ka munguar me Qeveritë e kaluar dhe kjo ditë është festuar çdo herë.
“Ne si organizata të dala nga lufta me nivel qendror nuk kemi festuar Ditën e Veteranit, pasi kjo Qeveri dhe ky kryeministër e kanë dëshmuar vetën që janë anti-UÇK dhe nuk kanë bërë asnjë hap më të vogël për t’i trajtuar dhe për tu dhënë të drejtat e tyre veteranëve, invalidëve dhe familjeve të dëshmorëve. Por, dua të them se kjo ditë është shënuar me Qeveritë e kaluar dhe kemi pasur një bashkëpunim të mirë, por me Qeverinë Kurti do të thotë nuk kemi bashkëpunim. I kemi ofruar bashkëpunim, nuk i ka mbajtur fjalët në takimin e parë”, ka thënë ai në emisionin “Ditari” në Tëvë1.
Sipas ligjit për veteranët e luftës së UÇK-së, Dita e Veteranit shënohet më 30 dhjetor.
Kjo ditë përkujton sakrificën, angazhimin dhe kontributin e veteranëve për sjelljen e lirisë dhe pavarësisë për popullin e Kosovës. Sjell në kujtesën tonë edhe betejën e parë të familjes së komandantit legjendar Adem Jashari në Prekaz, më 30 dhjetor 1991, aty ku nisi rruga e lirisë.
Në këtë ditë kujtohen Prekazi, Gllogjani e të gjitha vatrat e luftës, që i rezistuan makinerisë ushtarake serbe duke mos u përkulur deri në fitore.
