Kryeprokurori i Prokurorisë Themelore në Ferizaj, Shukri Jashari ka thënë se e ka autorizuar policinë që të sigurohen kamerat e sigurisë, në mënyrë që të evidentohen autorët e djegies së gjimnazi të vjetër në Ferizaj.
“Siç e dini edhe ju sot ka ndodhë një zjarrvënie në gjimnazin e vjetër. Fillimisht është kualifiku si zjarrvënie. Në momentin që kemi pranu informacionin kemi autorizu të gjitha njësitë policore me dalë në vendin e ngjarjes, të cilët kanë bo inspektimin e vendit të ngjarjes. Kemi autorizu policinë që të sigurohen të gjitha kamerat e sigurisë përreth objektit dhe të identifikohen personat e dyshimtë që e kanë shkaktu këtë vepër penale. Kushdo që e ka bo këtë vepër do të arrestohet dhe do të sillet para drejtësisë”, ka thënë ai në një konferencë për media.
Teksa ministri i Kulturës, Hajrullah Çeku ka lavdëruar punën e institucioneve pas kryerjes së këtij aktul
“Fatkeqësisht sot jemi zgju me një pamje që nuk është aspak e mirë dhe jemi ballafaqu me një situatë të vështirë si institucione të shtetit. Vetëm disa orë pas nisjes së punimeve për restaurimin e Gjimnazit të vjetër në Ferizaj ka ndodhë kjo situatë. Një zjarr e ka kaplu ndërtesën, një monument i mbrojtur i trashëgimisë kulturore për të cilin ministria ka financuar 500 mijë euro. Për fat të keq ka ndodhë kjo situatë, reagimi i institucioneve ka qenë i menjëhereshëm, policia ka qenë menjëherë në vend të ngjarjes dhe procedura të tjera janë duke u ndjekur. Ne jemi në koordinim me prokurorinë, policinë dhe të tjera institucione”, ka deklaruar Çeku.
Objekti i Gjimnazit është kapluar nga flakët mëngjesin e së martës derisa Komuna e Ferizajt ka njoftuar se një ditë më parë ka nisur renovimi i këtij objekti.
“Në orët e para të mëngjesit të sotëm, objekti i ish Gjimnazit të Vjetër në Ferizaj, u përfshi nga zjarr masiv, duke shkaktuar dëme të mëdha në gjithë objektin, objekt ky që përfaqëson vlerë të trashëgimisë kulturore e që së fundmi, pikërisht dje më 13.03.2023, nga ana e operatorit ekonomik të kontraktuar nga Ministria e Kulturës, Rinisë dhe Sportit, nisën ndërhyrjet e para për renovimin e tërësishëm të objektit. Komuna e Ferizajt, përmes Drejtorisë së Shërbimeve Publike dhe Emergjencë, Shërbimit të Zjarrfikjes, me të marr informatën, ka dalur në vendngjarje duke ndërmarr të gjitha veprimet e nevojshme, me gjithë kapacitetin e plotë, për të shuar zjarrin”, thuhet në njoftimin e Komunës.
