Jashari përmes një postimi në Facebook tha se kjo është një padrejtësi mbi çlirimtarët e vendit.
Ai thotë se është shprehur i bindur që Gucati e Haradinaj do të shpallën të pafajshëm nga Gjykata Speciale.
“Edhe një padrejtësi mbi çlirimtarët tonë.Me shqetësim mora lajmin që dy luftëtarët e Lirisë, kryetari i OVL-UÇK-së, Hysni Gucati dhe nënkryetari, Nasim Haradinaj, janë dënuar nga Gjykata Speciale në Hagë. Duke qenë krenar me luftën dhe kontributin e tyre, duke besuar në drejtësi, isha i bindur që ata do të shpallën të pafajshëm dhe se Gjykata do të gjykojë drejtë dhe do të hulumtoj në tërësi dhe në menyrë objektive rastin për të cilin janë akuzuar Gucati e Haradinaj”, ka shkruar ai.
Jashari uron që Apeli të përmirësohet sipas tij nga gabimi i bërë ndaj luftëtarëve.
“Uroj që në Apel të përmirësohet ky gabim i bërë ndaj luftëtarëve të Lirisë. Miq të mi, Hysni dhe Nasim vazhdoni të mbeteni të fortë, kjo padrejtësi do përfundojë dhe ne do shihemi shpejtë në Kosovën tonë të dashur”, tha ai.
Gjykata Speciale ka shpallur fajtor ish-drejtuesit e Organizatës së Veteranëve të Luftës së Ushtrisë Çlirimtare të Kosovës, Hysni Gucati e Nasim Haradinaj.
Ata janë dënuar me nga 4 vjet e gjysmë burgim, ku u llogaritet edhe koha e paraburgimit.
Gucati e Haradinaj u dënuan për publikimin e dokumenteve të Speciales. /Teve1.info/
