Analisti, Shemsi Jashari ka deklaruar se partitë opozitare disa herë kanë dhënë opsionet e tyre që janë një rrugë për të dalë nga kjo bllokadë.
Jashari në emisionin “Ditari” në tëvë1, thotë se Konjufca po të ishte i propozuari për kandidatë për kryetar do të ishte tashmë një Kuvend funksional.
Derisa, ai tha se Kurti ka përdorur figurën e Albulena Haxhiut duke ditur që nuk mbështetet nga partitë opozitare.
“Atë që po shohim tani, partitë opozitare disa herë kanë dhënë opsionet e ndryshme që janë një rrugë për të dalë nga kjo bllokadë. LVV-ja mund të mos i sheh si shumë të favorshme politikisht për to. Unë mendoj që Konjufca po të ishte i propozuar, tashmë do ta kishim një Kuvend funksional dhe nuk do të ishim në këtë situatë çfarë e kemi, e shohim që ai kur hyn në Kuvend përshëndetet me deputetët e tjerë, liderë të partive të tjera dhe kjo është një sinjal që ai është më i pjekur politikisht dhe nuk i sheh si armiq ata, por i sheh normal si kundërshtar politik. Unë mendoj që Kurti e ka përdorur qëllimisht më shumë figurën e Albulena Haxhiut duke e ditur që nuk mbështetet nga partitë opozitare dhe duke e përdorur këtë emër e ka blloku procesin për këtë fazë”, ka deklaruar ai.
Ndërsa, sa i përket Osmanit, analisti thotë se presidentja ka të njëjtën brengë sikur Kurti, ngase sipas tij vitin e ardhshëm janë zgjedhjet për president.
“Osmani është në të njëjtën hall si Kurti, ka zgjedhje për president në vitin e ardhshëm dhe ajo me secilin veprim të saj po tregon një kujdes të jashtëzakonshëm për të mos e hidhëruar Kurtin duke ditur që një numër të madh të deputetëve e ka këtë legjislaturë nëse nuk zgjatë kjo legjislaturë edhe në zgjedhjet e ardhshme mund t`i bie për një përqindje të madhe Kurtit numri i deputetëve, por prapë do të jenë një numër i madh i deputetëve që i dikton zgjedhjen e presidentit”, tha ai ndër të tjera./teve1.info/
