Jasharaj ka folur edhe për Ligjin e Pagave, për të cilin thotë se kanë marrë zotime se i njëjti do të votohet të enjten.
Kritika ka pasur në drejtim të Qeverisë së Kosovës, me ç’rast thotë se përkundër shkresave për dialog, kanë hasur në vesh të shurdhër.
“Së bashku me kolegë e kemi vlerësuar si vitin më të vështirë pas luftës vitin 2022, ngase që nga fillimi është vërejtur një mungesë e qasjes së duhur, gjegjësisht kemi pasur një qasje të gabuar të Qeverisë Kurti ndaj sindikatave por edhe ndaj dialogut, ngase edhe për kundër dhjetëra shkresave qoftë në emër të BSPK-së por edhe të SBAShK-ut, nuk janë përfill kërkesat tona për dialog”, tha Jasharaj, për Ekonomia Online.
Jasharaj ka thënë se versioni i dalë në medie për Ligjin e Pagave është i mirëseardhur.
Ai thotë se ka marrë zotime nga ministrja Arbërie Nagavci, se Ligji është në përputhje me kërkesat e SBAShK-ut.
“Teksa ka folur për mundësinë që këtë vit të kalojë në lexim të dytë Projektligji i Pagave, Jasharaj thotë se janari mund të jetë i qetë dhe se greva mund të mbyllet tërësisht.
“Opinioni duhet ta kuptojë qartë sepse ne nuk kemi mundur të vendosim ndryshe ngase e kishim një rezultat ndryshe, ngase e kishim një rezultat të ngushtë pro pezullimit dhe për të vazhduar grevën dhe e vetmja mundësi kur kemi situata të tilla të mos mbyllet greva, kjo nënkupton se greva mbetet si opsion i hapur dhe këtë afat e kemi lënë deri në janarin e vitit 2023. Po shkuan gjërat ashtu siç duhet po dolën të vërteta deklaratat e zonjës Nagavci dhe deputetët e bëjnë punën e tyre (e votojnë Ligjin e Pagave), atëherë në janar mund të kemi lajme të mira dhe mund të merret vendimi për mbyllje të grevës”, u shpreh Jasharaj.
Ligji i Pagave të mërkurën do të shqyrtohet nga Komisioni për Buxhet dhe Financa.
