Valët e cunamit kanë filluar të godasin pjesë të ndryshme të Japonisë, pas një tërmeti të fuqishëm në Oqeanin Paqësor, duke detyruar autoritetet të marrin masa emergjente në shkallë të gjerë.
Sipas Agjencisë Meteorologjike të Japonisë (JMA), një cunami me lartësi 60 centimetra është regjistruar në qytetin Hamanaka, në ishullin verior të Hokkaidos, si dhe në portin Kuji, në prefekturën Iwate, në ishullin kryesor të Honshut.
Kjo përbën një rritje nga valët fillestare prej 40 cm. Ndërkohë, një valë cunami prej 20 centimetrash është zbuluar edhe në Gjirin e Tokios.
Zyrtari i JMA-së për reagimin ndaj tërmeteve dhe cunamit, Shiji Kiyomoto, konfirmoi se tashmë janë regjistruar valët e dyta dhe të treta të cunamit.
Ai paralajmëroi se rreziku mbetet i lartë, duke shtuar se valët e mëdha mund të vazhdojnë për të paktën një ditë të tërë.
“Banorët duhet të qëndrojnë në zona të sigurta deri në njoftimin e radhës,” theksoi Kiyomoto, pa dhënë një afat konkret për heqjen e alarmit për cunami.
Ndërkohë, Agjencia Japoneze për Menaxhimin e Zjarreve dhe Fatkeqësive njoftoi se rreth 2 milionë banorë janë aktualisht nën këshillim evakuimi, që prek mbi 220 komuna përgjatë bregdetit të Paqësorit, duke përfshirë zona të dendura si Tohoku dhe Kanto, raporton AP.
Si pasojë e situatës emergjente, shërbimet e trageteve midis Hokkaidos dhe Aomorit, si dhe ato që lidhin Tokion me ishujt përreth, janë pezulluar.
Disa linja hekurudhore lokale janë ndërprerë ose po përballen me vonesa, sipas operatorëve të transportit.
Aeroporti i Sendait ka mbyllur përkohësisht pistën, për arsye sigurie.
Autoritetet japoneze u kanë bërë thirrje qytetarëve të ndjekin me kujdes udhëzimet zyrtare dhe të mos i nënvlerësojnë rreziqet e mundshme që vijojnë nga ky cunami. Përditësime të mëtejshme do të jepen në varësi të zhvillimit të situatës.
