Kandidatja për deputete nga Lidhja Demokratike e Kosovës, Janina Ymeri, ka bërë të ditur se ka dorëzuar padi për shpifje ndaj zëvendëskryeministrit të Kosovës, Glauk Konjufca.
Sipas Ymerit, padia lidhet me deklaratat e Konjufcës të bëra në emisionin televiziv Debat Plus, ku është diskutuar tema e energjisë elektrike.
Në reagimin e saj publik, ajo ka thënë:
“Me avokatin Donat Lushaku dorëzuam padinë për shpifje ndaj zëvendëskryeministrit Glauk Konjufca.”
Ymeri ka kërkuar që Konjufca të bëjë kërkimfalje publike për deklaratat e tij.
“Të paditurit, pra Glauk Konjufcës, i kërkohet të bëjë falje publike për shpifjen e bërë në emisionin Debat Plus.”
Ajo ka shtuar se, në rast se nuk ka kërkimfalje, do të kërkohet kompensim financiar, i cili sipas saj do të dhurohet për bamirësi.
“Në të kundërtën i kërkohet kompensim dhe, varësisht nga vlerësimi i gjykimit, të ardhurat nga kompensimi do t’i dërgohen shoqatës ‘Down Syndrome Kosova’.”
Ymeri gjithashtu ka theksuar se aktualisht është e përfshirë në disa procese ligjore kundër institucioneve dhe akterëve të pushtetit.
“Për më pak se një vit, unë kundër pushtetit ose akterëve të pushtetit jam në tri beteja ligjore.”
Sipas saj, një nga rastet lidhet me kallëzim penal në Prokuroria Speciale e Kosovës për dyshime mbi keqpërdorimet në çmimin e energjisë elektrike, për të cilin ka dhënë edhe dëshmi.
Po ashtu, ajo ka përmendur edhe padinë për shpifje nga Korporata Energjetike e Kosovës, për të cilën thotë se është rrëzuar, por ende është në proces.
Në fund, Ymeri e ka përshkruar situatën si përballje të një individi me institucionet shtetërore.
“Pra, një njeri kundrejt një aparati të tërë shtetëror me tri beteja ligjore.”
