Lëvizjet në holl nuk ishin të shpeshta, ani pse kishte shënuar ora për fillimin e vazhdimit të seancës.
Mosrespektimin e orarit opozita e vlerësoi si shpërfaqje e joseriozitetit nga partia që ka shumicën e deputetëve.
“Ne kemi thirrë pramë, nuk kanë ardhë. Sot thirrin vet, tash po bohet gati një orë edhe nuk kanë ardhë. E nafta ka shku 1.80. Edhe secila situatë më tutje, veç çka po e dëmton dhe rëndon jetën e secilit njeri në Kosovë. Pra, është joseriozitet total. Nuk e di, a i ka dalë malli i keq ditëve të fundit, a jo”, tha deputeti i Aleancës, Burim Ramadani.
Madje, këto vonesa, nga LDK-ja u krahasuan me teatër.
“Qetu është teatri s’kanë mujt me kry që katër vjet, e tash e kanë kthy teatër e kanë bo këtu. Janë t’u bo filma, janë t’u bo hajgare me krejt shtetin. Qetash e kanë bo teatër”, vlerësoi deputeti Ermal Sadiku.
Ani pse që të gjitha partitë opozitare, vendosën të marrin pjesë në vazhdimin e seancës konstituive jashtë afatit 30 ditor, nuk u përjashtua mundësia që për këtë rast t’i drejtohen Gjykatës Kushtetuese.
“Ne kemi tetë ditë afat sipas Kushtetutës për më dërgu rastin në Gjykatë Kushtetuese, do ta vlerësojmë brenda këtyre tetë ditëve dhe do të vendosim nëse do ta dërgojmë apo jo”, theksoi Përparim Gruda nga PDK.
E nga seanca që nuk zgjati më shumë se 5 minuta, dolën njëherësh pothuajse të gjithë deputetët.
Moskonstituimi i Kuvendit as në seancën e dytë, u kritikua ashpër nga dy taboret opozitare.
“Po e shohim një papërgjegjësi totale nga subjekti i parë, i cili nuk po gjen mënyrën që të kryejë obligimin e vet kushtetues, për ta prezantuar emrin e kryetarit të Kuvendit dhe për t’u bërë votimi dhe për t’u konstituar Kuvendi”, deklaroi Jehona Lushaku Sadriu.
“Ajo se çfarë ndodhi sot, ka qenë një seancë antikushtetuese, antidemokratike, jashtë çdo procedurë në fuqi të Kuvendit të Kosovës, dhe presim që qytetarët ta shohin këtë situatë, ta gjykojnë këtë situatë dhe ta dënojnë një subjekt politik, i cili e ka sjellë vendin buzë greminës. Kosova prej sotit nuk është më demokraci, në këtë vend nuk ka më as Kushtetutë e as rend kushtetues”, tha Enver Hoxhaj nga PDK.
Megjithatë, nga opozita u përsërit që do të marrin pjesë edhe në thirrjen e radhës për seancë, për ta përmbushur obligimin e tyre si deputetë.
