E sinjale për ngritje pagash lidhur me sektorin e arsimit ka dhënë ministrja e kësaj fushe, Arbërie Nagavci.
Nisur nga kjo, edhe në Sindikatën e Bashkuar e Arsimit presin që janari të sjellë lajme të mira.
“Po ndodhi kjo që e tha qeveria dhe po u publikua edhe vlera e koeficientit, janarin do ta kemi me lajme të mira dhe kjo nënkupton që do të vazhdojmë me punën në sektorin e arsimit. Nëse ndodhin gjëra tjera janë anëtarësia që do ta analizojnë dhe do të japin sinjale çfarë tutje.
Me këtë ligj të pagave kërkesat për greva do të jenë më pak të pranishme edhe në sektorin e arsimit por edhe në sektorët tjerë”, tha kreu i SBASHK-ut, Rrahman Jashari.
E një mundësi tjetër për grevë nuk e shohin të arsyeshme Instituti Pedagogjik i Kosovës.
“Është përfundimi i vitit shkollor i cili i ka telashet e veta, për shkak se bash në udhëzimin administrativ të cilin e ka nxjerrë Ministria e Arsimit lidhur me kalendarin. Tash, i kemi dy kalendare: një kalendar i cili vlen për shkollat të cilat nuk kanë humb mësimin, nuk kanë mbajtë grevë dhe kalendari tjetër i cili parasheh ndryshe përfundimin e vitit mësimor dhe të semestrit sidomos për ato shkolla. Kështu që ka aq shumë punë, unë s’besoj se do t’i shkojë mendja kujt të bëjë grevë”, tha Ismet Potera nga ky institut.
Ndërsa një përditësim të Ligjit për greva e kërkon njohësi i arsimit, Rinor Qehaja.
“Unë shpresoj shumë që shtatori i këtij viti të na shërbejë shumë si një mësim për të gjithë, se procesi mësimor nuk guxon të ndërprehet. Jemi duke i vuajtur ende pasojat, çdo nxënës, çdo prind dhe mësimdhënës tashmë e ka të qartë se kush është dëmi nga ky një muaj jashta procesit mësimor dhe shpresoj shumë që edhe institucionet ta kenë të qartë që të reagojnë me kohë, ta përditësojnë ligjin për greva, në mënyrë që të ardhmen askush të mos guxojë të cenojë të drejtën e shkollimit të nxënësve për një arsye sindikale çfarëdo qoftë ajo”, tha Rinor Qehaja nga Instituti Edguard.
Seanca e jashtëzakonshme për Ligjin për Paga u kërkua nga shefja e Grupit Parlamentar të Lëvizjes Vetëvendosje, Mimoza Kusari Lila për t’u shqyrtuar në afate të përshpejtuara kohore, në mënyrë që të hyjnë në fuqi qysh në shkurt me koeficientë të rinj.
Kronika e gazetares Albiona Hajdari.
