E burgosur qëndroi një vit e dy ditë.
Kjo kohë e kaluar në burgun e Lipjanit gjatë luftës në Kosovë, për Zahrije Podrimqaku nuk ishte e lehtë.
Madje, thotë se nën presionin e torturave ishte ngritur edhe aktakuza ndaj saj për të arsyetuar burgosjen.
Si dëshmitare në gjyqin ndaj ish gardianes, Nadica Cepkenoviq, ajo u sfidua nga mbrojtja për ngatërrim të identitetit të ish gardianes.
Pas saj, përjetimet në burgun e Lipjanit dhe keqtrajtimet nga gardianet, para trupit gjykues i rrëfeu Shahe Isafi.
“E para më ka godit tani e pandehura, derisa kam ra në alivanosje edhe më ka thanë “ti ke kërku NATO, tani na të tregojmë se çka është NATO”, ka thënë dëshmitari.
Sipas saj, ka qenë e pamundur të shpëtoje nga rrahja e maltretimi.
“E gjujshin paren, nëse ajo nuk kcen, si dënim e ke pas rrahjen. Edhe pse kom nejt me dy parë tesha, me dy parë pantolla, dy këmisha, dy xhaketa, që mos me m’kap prendreku, goditja, prapë se prapë ka qenë e pamundur me shpëtu….Afërdita Zeka për një muj rresht ka la rruba dhe më ka vendosë nëpër trup që të më qetësohet gjendja për shkak se trupi im ka qenë guri dhe ngjyrë të zezë, mavijosje të rëndë. Ajo ma ka shtri shtratin dhe më ka mbulu, për shkak se unë nuk kam qenë në gjendje me u kujdes për veten”, tha tutje dëshmitari.
Isafi thotë se ka qenë dëshmitare përmes zërit e dhunës ndaj të burgosurave të tjera.
“Unë i kom ni zanat, bërtimat, ama m’i pa me sy nuk i kom pa se në cdo derë kah nji gardiene na ka rujt. Dhe kur na kanë qit me punu, në bazë të zanit e kom vërejt se kush është rrahë”, përfundoj dëshmitari.
Gjyqi ndaj Cepkenoviq do të vazhdojë më dëgjimin e dëshmitareve të tjera.
