Anëtari i kryesisë së Sindikatës së Minatorëve të “Trepçës”, Gani Jakupi ka thënë se nuk e dinë arsyeje pse është anuluar konkursi për kryeshef të Ndërmarrjes “Trepça”.
Jakupi në emisionin ”Info Nata” ka thënë ndryshimi i kryeshefit ka qenë pjesë e marrëveshjes me deputetet, por sipas tij asnjë nga kërkesat e tyre nuk janë realizuar deri me tani.
“Ne nuk kemi asnjë informacion pse është anuluar konkursi, ndoshta qëllimi është vetëm mos me e ndërru këtë kryeshef, sepse është e pamundur të gjithë kandidatet mos me i plotësuar kushtet…Marrëveshja është bërë që më u ndërru kryeshefi…Disa persona që i njohim ne i kanë plotësuar kushtet, 2-3 janë të Mitrovicës. Ne nuk i kemi parë kushtet që janë kërkuar në këtë konkurs, por nga ato që i di më herët, nuk ka mundësi mos me i plotësu askush. Ne jemi pak të dëshpëruar sepse asnjë nga kërkesat nuk janë realizuar deri më tani”, ka deklaruar ai.
Konkursi për kryeshef të Ndërmarrjes “Trepça”, është anuluar për shkak të mungesës së procesit konkurrues.
Sipas vendimit të publikuar në medie, në konkurs nuk kanë aplikuar 4 veta të cilët i plotësojnë kushtet e konkurrimit, siç parashihet me Kodin e Etikës dhe Qeverisjes Korporative për Ndërmarrjet Publike.
