Të paktën 330 persona janë vrarë në Gaza nga sulmet e ushtrisë izraelite, që u kryen në natën e së martës.
Ushtria e Izraelit ka thënë se po kryen sulme në shkallë të gjerë pasi bisedimet për zgjatje të armëpushimit nuk arritën marrëveshjen. Kjo shënon valën më të madhe të sulmeve ajrore që nga 19 janari, kur hyri në fuqi armëpushimi, raporton BBC.
Zyra e kryeministrit Benjamin Netanyahu tha se Izraeli tash e tutje do të veprojë kundër Hamasit me fuqi ushtarake në rritje.
Mes të vdekurve thuhet se janë figura të larta të sigurisë dhe politike të Hamasit – por mjekët thonë se shumë fëmijë u vranë gjithashtu në sulmet ajrore.
Hamasi paralajmëroi se ajo që e quajti “përshkallëzimi i paprovokuar” i Izraelit kishte shkelur në mënyrë të njëanshme armëpushimin dhe kishte vënë në rrezik fatin e pengjeve.
Me mbështetjen e SHBA-së, Izraeli ka bërë presion për kthimin e pengjeve në këmbim të një armëpushimi afatgjatë dhe lejimin e kthimit të ndihmës në Gaza.
Hamasi ka këmbëngulur në bisedimet për përfundimin e përhershëm të luftës dhe tërheqjen e plotë të trupave izraelite nga Gaza në përputhje me kushtet e marrëveshjes origjinale të armëpushimit.
Shtëpia e Bardhë tha se ishte konsultuar nga Izraeli për këto sulme të fundit dhe se në vend të një marrëveshjeje të re, Hamasi kishte zgjedhur “refuzimin dhe luftën”./teve1.info/
