Edhe gjatë ditës së martë, Izraeli ka vazhduar ofensivën e tij të re ushtarake në Gaza mes kritikave në rritje ndërkombëtare, duke ndërmarrë sulme ajrore që, sipas zyrtarëve palestinezë të shëndetësisë, vranë të paktën 85 persona.
Ndërkohë, autoritetet izraelite thanë se kishin lejuar hyrjen e dhjetëra kamionëve me ndihma humanitare në territor.
Megjithatë, Kombet e Bashkuara njoftuan se, pavarësisht hyrjes së ndihmave dy ditë më parë, furnizimet e domosdoshme ende nuk kanë arritur tek banorët e Gazës, të cilët përballen me një krizë akute urie pas gati tre muajsh bllokadë. Ekspertët paralajmërojnë se miliona njerëz janë në rrezik të madh nga mungesa e ushqimit.
Nën presion ndërkombëtar, Izraeli pranoi këtë javë të lejojë një sasi “minimale” ndihmash, duke hequr pjesërisht ndalimin ndaj furnizimeve me ushqim, ilaçe dhe karburant, që më parë kishte synuar të ushtrojë presion mbi Hamasin.
Zëdhënësi i OKB-së, Stéphane Dujarric, sqaroi se ndihmat që kanë hyrë në Gaza nuk janë shpërndarë ende tek njerëzit në nevojë, raporton AP.
Ai tha se ushtria izraelite ka imponuar një proces të ri sigurie që kërkon shkarkimin dhe ringarkimin e furnizimeve në kamionë të ndryshëm, duke u mohuar kështu punonjësve të ndihmës kohën për t’i çuar ato në pikat e shpërndarjes.
Sipas COGAT, organi izraelit që mbikëqyr ndihmën humanitare, pesë kamionë hynë të hënën dhe 93 të martën. Por OKB-ja raportoi se numri real ishte më i ulët dhe se asnjë nga ndihmat – përfshirë miell për furrat, ushqim për të varfërit dhe furnizime për foshnje – nuk kishte arritur tek përfituesit.
Dujarric e përshkroi procesin aktual të shpërndarjes si “të gjatë, kompleks, të ndërlikuar dhe të rrezikshëm”, duke theksuar se pengesat burokratike dhe kërkesat e ushtrisë po vonojnë ndjeshëm ndihmën humanitare. COGAT nuk komentoi menjëherë mbi këto procedura.
