Kisha Ortodokse Greke e Shën Porfirit dhe kompleksi i saj në qytetin e Gazës janë urdhëruar të evakuohen nga Forcat Mbrojtëse të Izraelit, mësoi të mërkurën gazeta Times of Israel.
Komiteti i emergjencës i Kishës së Familjes së Shenjtë në Qytetin e Gazës deklaroi të mërkurën se do të qëndrojë në kompleksin kishtar për të mbështetur priftërinjtë, murgeshat dhe civilët që janë strehuar aty, pavarësisht përgatitjeve të Izraelit për një ofensivë të re në qytet.
Në një deklaratë zyrtare,të cituar nga agjencia Anadolu, komiteti theksoi se vendimi u mor pas një deklarate të përbashkët të Patriarkanës Latine të Jerusalemit dhe Patriarkanës Ortodokse Greke të Jerusalemit, të cilat paralajmëruan për një operacion të afërt ushtarak dhe për urdhra të vazhdueshëm evakuimi në zonën e Qytetit të Gazës.
“Që nga dita e parë e luftës, komiteti ka punuar pa u lodhur për t’u shërbyer të zhvendosurve brenda kishës dhe komunitetit jashtë saj”, thuhet në deklaratën e Kishës së Familjes së Shenjtë.
“Ne ripërtërijmë angazhimin tonë për të qëndruar me Kishën, krah për krah me priftërinjtë dhe murgeshat, për të mirën e përbashkët të komunitetit.”
Deklarata e përbashkët e patriarkateve, e publikuar të martën në Jerusalem, vuri në dukje se autoritetet izraelite kishin njoftuar “disa javë më parë” për planet për të marrë kontrollin e Qytetit të Gazës, ndërsa raportimet mediatike tregonin për “mobilizim masiv ushtarak dhe përgatitje për një ofensivë të afërt”.
“Urdhrat e evakuimit ishin tashmë në fuqi për disa lagje në Qytetin e Gazës”, thanë patriarkët. “Vazhdojnë të merren raportime për bombardime të rënda. Ka më shumë shkatërrime dhe vdekje në një situatë që ishte tashmë dramatike para këtij operacioni.”
Sipas deklaratës, qindra mijëra civilë ende gjenden në Qytetin e Gazës, përfshirë të krishterët që kanë gjetur strehë në kompleksin ortodoks grek të Shën Porfirit dhe në atë të Familjes së Shenjtë.
Patriarkatet paralajmëruan se shumë prej njerëzve brenda këtyre objekteve janë “të dobësuar dhe të kequshqyer për shkak të vështirësive të muajve të fundit”, duke theksuar se ikja drejt jugut “do të ishte asgjë më pak se një dënim me vdekje”.
Komiteti i Kishës së Familjes së Shenjtë sqaroi se deklarata përfaqëson vendimin e tij dhe mbështet qëndrimin e patriarkateve se banorët e strehuar në kishat e Gazës, ashtu si të gjithë qytetarët e tjerë, “do të duhet të vendosin sipas ndërgjegjes së tyre se çfarë do të bëjnë”.
Së fundmi, autoritetet izraelite kanë miratuar plane për të pushtuar pjesët e mbetura të Gazës, duke filluar me evakuimin e afërsisht një milion banorëve nga Qyteti i Gazës, përpara rrethimit të tij dhe dërgimit të trupave nëpër lagje, e më pas duke avancuar drejt kampeve të refugjatëve në Gazën qendrore.
Që nga tetori i vitit 2023, Izraeli ka vrarë pothuajse 63,000 palestinezë në Gaza. Fushata ushtarake ka shkaktuar shkatërrim të madh në enklavën që tashmë po përjeton një krizë të rëndë urie.
Izraeli urdhëron evakuimin e kishës ortodokse në Gaza, por Komiteti premton të qëndrojë në vend
