Ministri i Mbrojtjes izraelit tha të mërkurën se trupat do të qëndrojnë në tw ashtuquajturat zona të sigurisë në Rripin e Gazës, Liban dhe Siri për një afat të pacaktuar.
“Ndryshe nga e kaluara, ushtria nuk po evakuon zonat që janë pastruar dhe kapur”, tha Israel Katz në një deklaratë. Ushtria “do të mbetet në zonat e sigurisë si një tampon midis armikut dhe komuniteteve (izraelite) në çdo situatë të përkohshme apo të përhershme në Gaza – si në Liban dhe Siri”.
Forcat izraelite kanë pushtuar zona të mëdha të Gazës në javët e fundit në një fushatë të ripërtërirë pasi Izraeli i dha fund armëpushimit muajin e kaluar.
Izraeli gjithashtu ka refuzuar të tërhiqet nga disa zona në Liban pas një armëpushimi me grupin militant Hezbollah vitin e kaluar dhe kapi një zonë tampon në Sirinë jugore pas përmbysjes së presidentit, Bashar Assad, raporton AP.
Afër 950 palestinezë janë vrarë dhe mbi 7,000 të tjerë janë plagosur në Bregun Perëndimor të pushtuar që nga fillimi i luftës izraelite në Gaza në tetor 2023, tha Ministria e Shëndetësisë.
Në korrik 2024, Gjykata Ndërkombëtare e Drejtësisë e shpalli të paligjshëm pushtimin prej dekadash të tokës palestineze nga Izraeli dhe kërkoi evakuimin e të gjitha kolonive ekzistuese në Bregun Perëndimor dhe Jerusalemin Lindor.
