Izraeli deklaroi të shtunën se Hamasi ka bërë ndryshime “të papranueshme” në një propozim për armëpushim të ndërmjetësuar nga Katari për konfliktin në Rripin e Gazës.
“Ndryshimet që Hamasi po kërkon të bëjë në propozimin e Katarit na u përcollën mbrëmë dhe janë të papranueshme për Izraelin,” tha zyra e kryeministrit Benjamin Netanyahu në një deklaratë zyrtare.
Megjithatë, në të njëjtën deklaratë, u theksua se Netanyahu ka urdhëruar që ftesa për negociata të reja të pranohet dhe që kontaktet për kthimin e pengjeve izraelite të vazhdojnë, në përputhje me propozimin fillestar të Katarit, të cilin Izraeli e ka miratuar. Sipas njoftimit, ekipi negociator izraelit do të niset për në Katar të dielën për të vijuar bisedimet.
Nga ana tjetër, Hamasi tha të premten se ia kishte dorëzuar përgjigjen e tij zyrtare ndërmjetësve, pasi përfundoi konsultimet me fraksionet dhe grupet e tjera palestineze, ka raportuar Anadoly.
Grupi e përshkroi përgjigjen si “pozitive” dhe shprehu gatishmëri për të nisur menjëherë një raund negociatash mbi mënyrën e zbatimit të marrëveshjes së propozuar.
Sipas autoriteteve izraelite, Hamasi mban aktualisht rreth 50 pengje në Gaza, 20 prej të cilëve konsiderohen ende të gjallë.
Në të njëjtën kohë, më shumë se 10,400 palestinezë ndodhen në burgjet izraelite, ku sipas raporteve të organizatave të të drejtave të njeriut, ata përballen me tortura, kequshqyerje dhe neglizhencë mjekësore – kushte që kanë sjellë edhe viktima.
Që nga tetori i vitit 2023, Izraeli ka ndërmarrë një ofensivë ushtarake në Rripin e Gazës ku ka vrarë mbi 57,300 palestinezë, shumica prej tyre gra dhe fëmijë, sipas burimeve palestineze dhe organizatave ndërkombëtare.
