Të dielën, ushtria izraelite njoftoi se avionët e saj luftarakë goditën disa objektiva në kryeqytetin e Jemenit, Sanaa, përfshirë pallatin presidencial dhe disa termocentrale.
Ministria e Shëndetësisë e Jemenit njoftoi se dy persona humbën jetën dhe 35 të tjerë u plagosën si pasojë e sulmeve.
Sipas një deklarate ushtarake, sulmet kishin në shënjestër infrastrukturën e rebelëve Huthi, përfshirë termocentralet Asar dhe Hizaz, një depo karburanti, si dhe një bazë ushtarake ku ndodhet pallati presidencial.
Sipas transmetuesit publik izraelit KAN, në operacion morën pjesë 14 avionë luftarakë të cilët hodhën rreth 40 municione në zona të ndryshme të kryeqytetit jemenas.
Nga ana tjetër, televizioni Al-Masirah, konfirmoi sulmet dhe raportoi se një ndër strukturat e goditura ishte një objekt i Kompanisë së Naftës Jemenase në Rrugën 60 Metra, si dhe Stacioni Qendror i Energjisë Haziz në lagjen Sanhan, në jug të Sanaa-s.
Kjo nuk është hera e parë që Izraeli godet këtë termocentral. Sulme të ngjashme ajrore janë kryer edhe më 18 gusht.
Sipas Al-Masirah, shumica e avionëve izraelitë u neutralizuan dhe u detyruan të tërhiqen, ndërsa ekipet e mbrojtjes civile po punojnë për të shuar zjarret e shkaktuara nga bombardimet në pjesën jugore dhe perëndimore të qytetit.
Ushtria izraelite deklaroi se operacionet ajrore u kryen në përgjigje të sulmeve të vazhdueshme të grupit jemenas ndaj territorit izraelit, ka cituar Anadolu.
Sipas saj, në sulmin me raketa të së premtes, Huthët përdorën municione thërrmuese – një zhvillim i paprecedentë që nga viti 2023.
Që nga nëntori i atij viti, Huthitët kanë ndërmarrë një seri sulmesh me raketa dhe dronë kundër objektivave izraelite dhe kanë shënjestruar anije tregtare në Detin e Kuq, Gjirin e Adenit dhe Detin Arabik, në shenjë mbështetjeje për palestinezët në Rripin e Gazës.
Sipas të dhënave të fundit, ofensiva izraelite atje ka shkaktuar mbi 62,600 viktima.
