Ministri i Jashtëm izraelit, Gideon Saar, tha se po ndërpret të gjitha kontaktet me shefen e politikës së jashtme të BE-së, Kaja Kallas, duke e akuzuar atë se “po vepron në mënyrë obsesive dhe me padrejtësi të hapur” ndaj Izraelit.
Në një postim, Saar kritikoi Kallasin për krahasimin e Izraelit me Afrikën e Jugut të epokës së aparteidit, duke thënë se vërejtje të tilla përbëjnë shpifje.
“Si Ministër i Jashtëm i Shtetit të Izraelit, nuk kam zgjidhje tjetër veçse të ndërpres çdo kontakt me znj. Kallas derisa ajo të tërheqë shpifjen e gjakut që i drejtoi shtetit të vetëm hebre në botë, i cili është gjithashtu e vetmja demokraci në Lindjen e Mesme. Dhe kjo është ajo që po bëj,” tha ai në një postim në platformën X.
Euractiv raportoi se shefja e politikës së jashtme të BE-së bëri krahasimin gjatë bisedimeve konfidenciale me zyrtarë meksikanë në Mexico City, ku ajo udhëtoi nga 20 deri më 22 maj si pjesë e një delegacioni të lartë të BE-së.
Zyrtarë dhe diplomatë, përfshirë njerëz të pranishëm në takim, i thanë Euractiv se Kallas foli për një vizitë vitin e kaluar në Afrikën e Jugut dhe muzeun e saj të aparteidit në Johanesburg.
Ajo thuhet se e lidhi sundimin e Izraelit mbi palestinezët në Gaza dhe Bregun Perëndimor të pushtuar me sistemin e ndarjes racore të Afrikës së Jugut, i cili zgjati nga viti 1948 deri në fillim të viteve 1990.
