Izraeli ndaloi mijëra palestinezë që të ktheheshin në shtëpitë e tyre në Rripin verior të Gazës të dielën, pasi akuzoi Hamasin për shkelje të armëpushimit, pasi sipas tyre ata ndryshuan rendin e pengjeve të liruara.
Zyrtarët lokalë të shëndetësisë thanë se forcat izraelite qëlluan mbi turmat, duke vrarë dy persona dhe duke plagosur nëntë.
Përplasja në Gaza erdhi një ditë pasi Presidenti i SHBA Donald Trump sygjeroi që shumica e popullsisë së Gazës të paktën të zhvendosej përkohësisht diku tjetër, duke përfshirë Egjiptin dhe Jordaninë, në mënyrë që të “pastrohet” enklava e shkatërruar nga lufta.
Egjipti, Jordania dhe vetë palestinezët e kanë hedhur poshtë më parë një skenar të tillë, nga frika se Izraeli mund të mos lejojë kurrë që refugjatët të kthehen.
Bassem Naim, një zyrtar i lartë i Hamasit, tha se palestinezët nuk do ta pranonin kurrë një propozim të tillë, “edhe nëse në dukje me qëllim të mirë nën maskën e rindërtimit”. Ai tha se palestinezët mund ta rindërtojnë Gazën “madje edhe më mirë se më parë” nëse Izraeli heq bllokadën e tij.
Sipas armëpushimit Izrael-Hamas, Izraeli të shtunën do të fillonte t’i lejonte palestinezët të ktheheshin në shtëpitë e tyre në Gazën veriore në këmbë përmes të ashtuquajturit korridori Netzarim që ndan Gazën. Izraeli e vendosi këtë masë në pritje derisa Hamasi të lirojë një peng për të cilin Izraeli tha se supozohej të ishte liruar të shtunën.
Hamasi nga ana e tij akuzoi Izraelin për shkelje të marrëveshjes.
Turma njerëzish që udhëtonin në këmbë dhe mbanin gjërat e tyre mbushën një rrugë kryesore që të çonte në një pikë kontrolli të mbyllur izraelite.
“Ne kemi qenë në agoni për një vit e gjysmë,” tha Nadia Qasem, një grua e zhvendosur nga veriu teksa priste. “Që nga ora 1 e mëngjesit ne kemi pritur të kthehemi.”
Forcat izraelite qëlluan mbi turmat në tre raste gjatë natës dhe të dielën, duke vrarë dy persona dhe duke plagosur nëntë, duke përfshirë një fëmijë, sipas Spitalit Al-Awda, i cili mori viktimat, raporton AP.
Nuk kishte asnjë koment të menjëhershëm nga ushtria izraelite.
Izraeli është tërhequr nga disa zona të Gazës si pjesë e armëpushimit, e cila hyri në fuqi të dielën e kaluar, por ushtria ka paralajmëruar njerëzit që të qëndrojnë larg forcave të saj, të cilat ende veprojnë në një zonë tampon brenda Gazës përgjatë kufirit dhe në korridorin Netzarim.
Hamasi liroi katër ushtarë të reja femra izraelite të shtunën dhe Izraeli liroi rreth 200 të burgosur palestinezë.
Por Izraeli tha se një tjetër peng, gruaja civile Arbel Yehoud, supozohej të ishte liruar përpara ushtarëve dhe se nuk do të hapte korridorin Netzarim derisa ajo të lirohej. Ai gjithashtu akuzoi Hamasin për dështimin për të dhënë detaje mbi kushtet e pengjeve që do të lirohen në javët e ardhshme.
