Vizatimet e saj kanë mbetur të shpërndara nëpër dhomë.
Kur dëgjoi jehonën e bombave izraelite, 22 – vjeçarja Duniana al-Amour, vrapoi për në dhomën e saj dhe u përpoq të shpëtonte përmes vizatimit, ashtu siç kishte bërë gjatë të gjitha luftërave të mëparshme të Gazës.
Por këtë herë, lapsi i saj nuk u takua kurrë me letrën.
Al-Amour u vra nga një predhë izraelite, duke e bërë atë një nga të parat viktima nga të paktën 46 palestinezë, përfshirë 16 fëmijë që u vranë gjatë tre ditëve luftime të rënda midis Izraelit dhe grupit militant të Xhihadit Islamik.
Kunata e saj, Simone, tha se jeta e Dunianës rrotullohej rreth artit të saj.
“Çdo vit Izraeli bombardon këtej, por ata zakonisht bombardojnë fëmijët. Duniana u vra, nuk e kisha imagjinuar kurrë se do ta humbnim. Të gjithë e njihnin. Ajo ishte artiste dhe i pëlqente të vizatojë. Ajo vizatonte kur ishte e lumtur apo e trishtuar”, thotë ajo.
E vëllai i Dunianës thotë se Izraeli, me aftësitë e tij të sofistikuara të vëzhgimit dhe shënjestrës, e dinte se po gjuanin në civilë.
“Ky është veprim barbar çnjerëzor .Ata janë të aftë me teknologjinë më të re dhe e dinë se shënjestra e tyre është një fëmijë apo një i moshuar. Ata mburren me këtë dhe e dinë se kush është civil e kush jo”, thotë ai.
Të vrarët gjatë dhunës së fundit në Gaza përfshijnë dy komandantë të lartë të Xhihadit Islamik, njëri prej të cilëve Izraeli tha se e kishte vënë në shënjestër për të penguar një sulm të afërt.
Asnjë izraelit nuk u vra, e as nuk u plagos rëndë.
Kronika e realizuar nga gazetarja Jetmira Lushi.
