Qytetarët e Kosovës nuk do të kenë më nevojë për viza për të udhëtuar në Izrael. Kjo pasi Kosova dhe Izraeli kanë nënshkruar marrëveshjen për heqjen e vizave.
Nënshkrimin e marrëveshjes ndërshtetërore për heqjen e vizave e kanë bërë ministrja e Punëve të Jashtme dhe Diasporës, Donika Gërvalla dhe ministri i Brendshëm i Izraelit, Moshe Arbel.
Kësisoj, Izraeli bëhet shteti i 50-të që mundëson lëvizjen e lirë për qytetarët e Kosovës. Marrëveshja do të fillojë së zbatuari nga 19 shtatori i këtij viti.
“Qytetarët e Republikës së Kosovës nga 19 shtatori i këtij viti mund të udhëtojnë pa viza edhe në Izrael, kjo falë marrëveshjes që sot nënshkruam me Ministrin e Brendshëm të Izraelit, Moshe Arbel, pas takimit dypalësh që patëm paraprakisht”, thuhet në njoftimin e Gërvallës në Facebook./teve1.info/
