Izraeli ndaloi hyrjen e te gjitha mallrave dhe furnizimeve në Rripin e Gazës dhe paralajmëroi për “pasoja shtesë” nëse Hamasi nuk pranon një propozim të ri për zgjatjen e fazës së armëpushimit sipas kushteve që ata kanë vënë.
Hamasi ka akuzuar Izraelin se po përpiqej të prishte armëpushimin dhe tha se vendimi i tij për të ndërprerë ndihmën ishte “zhvatje e lirë, një krim lufte dhe një sulm i hapur ndaj marrëveshjes (armëpushimit)”.
Në fazën e parë që skadoi të shtunën, përfshihej një rritje e ndihmës humanitare.
Faza e dytë parashihte që Hamasi të lirojë dhjetëra pengje të mbetur në këmbim të tërheqjes izraelite dhe një armëpushimi të qëndrueshëm.
Një zyrtar izraelit, duke folur në kushte anonimiteti në përputhje me rregulloret, tha se vendimi për të pezulluar ndihmën u mor në koordinim me administratën Trump, raporton AP.
Zyra e kryeministrit izraelit Benjamin Netanyahu tha më herët të dielën se mbështet atë që e përshkroi si një propozim nga i dërguari i SHBA-së për Lindjen e Mesme Steve Ëitkoff për të zgjatur fazën e parë të armëpushimit deri më 20 prill.
Sipas këtij propozimi, Hamasi do të lironte gjysmën e pengjeve në ditën e parë dhe pjesën tjetër kur të arrihet një marrëveshje për një armëpushim të përhershëm, sipas zyrës së Netanyahut.
Një zyrtar egjiptian tha se Hamasi dhe Egjipti nuk do të pranojnë një propozim të ri që synon rikthimin e pengjeve pa e ndalë luftën.
