Izraeli po përballet me kritika të ashpra pasi ndaloi të dielen hyrjen e ushqimeve dhe të gjitha furnizimeve të tjera bazike në Gaza.
Ndërmjetësuesit e marrëveshjes së armëpushimit, Egjipti dhe Katari e kanë akuzuar Izraelin se po e përdorë urinë si armë.
Hamasi akuzoi Izraelin se po përpiqej të prishte fazën tjetër të dielën disa orë pas përfundimit të fazës së parë dhe e quajti vendimin e Izraelit për të ndërprerë ndihmën “një krim lufte dhe një sulm flagrant”.
Në fazën e dytë, Hamasi do të lironte dhjetëra pengje të mbetura në këmbim të një tërheqjeje izraelite nga Gaza dhe një armëpushim të qëndrueshëm. Negociatat për fazën e dytë ishin menduar të fillonin një muaj më parë, por nuk kanë filluar.
Shefi humanitar i OKB-së, Tom Fletcher, e quajti vendimin e Izraelit “alarmant”, duke vënë në dukje se ligji ndërkombëtar humanitar e bën të qartë se qasja e ndihmës duhet të lejohet, raporton AP.
Pesë grupe joqeveritare i kërkuan Gjykatës Supreme të Izraelit një urdhër të përkohshëm që ndalon shtetin të parandalojë hyrjen e ndihmave në Gaza, duke pretenduar se masa shkel detyrimet e Izraelit sipas ligjit ndërkombëtar: “Këto detyrime nuk mund të kushtëzohen nga konsideratat politike”.
Agjencitë e OKB-së dhe grupet e ndihmës akuzuan Izraelin se nuk ka ndihmuar mjaftueshëm gjatë 15 muajve të luftës.
Gjykata Ndërkombëtare Penale tha se kishte arsye për të besuar se Izraeli kishte përdorur “urinë si një metodë lufte” kur lëshoi një urdhër arresti për Netanyahun vitin e kaluar. Akuza është gjithashtu thelbësore për çështjen e Afrikës së Jugut në Gjykatën Ndërkombëtare të Drejtësisë që akuzon Izraelin për gjenocid.
