Kandidati i Partisë Demokratike të Kosovës për kryetar të Zubin Potokut, Izmir Zeqiri, ka treguar për sfidat dhe tensionet me të cilat është përballur gjatë fushatës dhe marrjes së detyrës së kryetarit në komunën veriore.
Zeqiri tha se në garë kanë hyrë si aktorë lokalë për zgjedhje normale, por situata në terren u përshkallëzua ditë pas dite.
“Në garë kemi hy si akterë lokalë, për zgjedhje normale. Gjatë gjithë fushatës kam bërë thirrje për qetësi, pavarësisht kërcënimeve nga pala serbe, mirëpo dita-ditës ngjarjet u ashpërsuan. Nuk prisja një përshkallëzim të tillë, sepse nuk ishte e nevojshme të përballemi me njëri-tjetrin”, tha Zeqiri në emisionin “Këndi i Debatit” në Tëvë1.
Ai kujtoi se dita e betimit dhe hyrja në zyrë u shndërrua në një moment të rrezikshëm, duke thënë se i ka ngjarë luftës.
“U ballafaquam me gjendje lufte. Plumbat na kanë shkuar edhe pranë veshëve, këtë e kanë kapur edhe kamerat. Patëm kundërshtim shumë të ashpër, por me kalimin e kohës situata filloi të stabilizohej”, shtoi ai.
Zeqiri tha se pas sulmit në Banjskë, shumëçka ndryshoi në terren.
“Banjska ndryshoi shumë gjëra. Si duket, pësuan krerët e kriminelëve dhe dita ditës disa edhe kanë ikur, sepse ju ra reputacioni. Pastaj filloi të përmirësohej situata dhe komunikimi me qytetarët”, përfundoi Zeqiri. /teve1.info/
