Kryetari i Kuvendit të Kosovës, Dimal Basha, ka komentuar për herë të parë dorëheqjen e ministrit të Infrastrukturës, Liburn Aliut, duke thënë se pakënaqësitë janë pjesë normale e jetës demokratike dhe nuk duhet dramatizuar.
“Është komplet e natyrshme me pas pakënaqësi mes vete. Unë edhe si deputet kam pas pakënaqësi me ministra dhe kemi pas debat të hapur në Kuvend. Kjo është demokracia. Edhe në familje ke pakënaqësi kajherë, por me rëndësi është që të vazhdojmë rrugëtimin para. E çmoj kontributin e tij si në Lëvizje dhe në Ministri”, deklaroi Basha.
Por konferenca e tij për shtyp ka nxitur reagim të ashpër nga deputetja e Nismës Socialdemokrate, Xhevahire Izmaku, e cila përmes një postimi në Facebook ka thënë se Basha nuk mund të fshihet pas një deklarate, duke kërkuar dorëheqjen ose shkarkimin e tij.
“Jo, nuk kalon ky turp me një konferencë për shtyp! Dorëheqje ose shkarkim! Kërkoj që jo vetëm ne që ngritëm dorën kundër, por edhe njerëzit me gjykim të shëndoshë dhe ata që e duan vendin e sakrificën e UÇK-së, edhe brenda VV-së, të kërkojnë dorëheqjen e menjëhershme të Dimal Bashës”, ka shkruar Izmaku.
Ajo e ka akuzuar Bashën për bashkautorësi në punime shkencore që, sipas saj, janë në përputhje me narrativat serbe dhe ruse kundër luftës së UÇK-së.
“Një njeri që ka bashkautorësi në punime shkencore kundër UÇK-së, në linjë me Serbinë, Dik Martyn dhe Rusinë, nuk mund dhe nuk guxon të udhëheqë Kuvendin e Kosovës. PDK dhe AAK duhet të japin llogari për këtë shkarje të rëndë! Punimet shkencore nuk botohen me bashkautorësi pa besim dhe pa përputhje në qëndrime. Me votën e tyre, ata e bënë këtë narrativë pjesë të institucionit më të lartë të vendit”, ka përfunduar ajo.
