Me urdhër të Prokurorisë Speciale të Republikës së Kosovës, të mërkurën është arrestuar S.J., nën dyshimin për kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge”.
Sipas komunikatës së përbashkët të Prokurorisë dhe Policisë së Kosovës, i dyshuari është ndaluar në rajonin e Prishtinës, dhe në kamionin që po drejtonte i janë gjetur dhe sekuestruar mbi 200 kg substancash narkotike.
Hetuesit nga Drejtoria për Hetimin e Trafikimit me Narkotikë, së bashku me Prokurorinë Speciale, po ndërmarrin veprimet e nevojshme hetimore në përputhje me ligjin dhe Kodin e Procedurës Penale.
S.J. është ndaluar për 48 orë me vendim të Prokurorisë Speciale.
“Prokuroria Speciale dhe Policia e Kosovës ritheksojnë angazhimin e tyre të vazhdueshëm në luftimin e kësaj dukurie, përmes ndjekjes penale të të gjithë kryesve të mundshëm të veprave penale”, theksohet në njoftim./teve1.info/
