Zyrtarët në të gjithë Evropën kanë kritikuar ashpër trajtimin e Izraelit ndaj aktivistëve të arrestuar nga një flotilje ndihmash që shkonte në Gaza, pasi një ministër i lartë izraelit postoi një video të tyre të lidhur dhe të detyruar të gjunjëzohen.
Kryeministrja italiane, Giorgia Meloni, bëri thirrje për lirimin e menjëhershëm të çdo qytetari italian të ndaluar dhe kërkoi që Izraeli të kërkojë falje.
“Është e patolerueshme që këta protestues, midis të cilëve ka shumë qytetarë italianë, i nënshtrohen këtij trajtimi, i cili shkel dinjitetin njerëzor”, tha Meloni në një deklaratë, duke iu referuar videos së postuar nga Ministri i Sigurisë Kombëtare i ekstremit të djathtë, Itamar Ben Gvir.
Videoja u kritikua gjithashtu nga Ministri i Jashtëm i Francës, Jean-Noël Barrot, i cili tha se kishte kërkuar që të thirrej ambasadori i Izraelit në Francë.
“Siguria e bashkatdhetarëve tanë është një përparësi e vazhdueshme”, shkroi ai në një postim në X.
“Çfarëdo që të mendohet për këtë flotilje – dhe ne kemi treguar në disa raste mosmiratimin tonë ndaj kësaj iniciative – bashkatdhetarët tanë që po marrin pjesë në të duhet të trajtohen me respekt dhe të lirohen sa më shpejt të jetë e mundur.”
“Ky trajtim është monstruoz, i turpshëm dhe çnjerëzor”, tha Ministri i Jashtëm spanjoll Jose Manuel Albares në Berlin në një regjistrim të ndarë me median, duke shtuar se i ngarkuari me punë i Izraelit në Madrid ishte thirrur në shenjë proteste.
Kurse, Ministrja e Jashtme irlandeze shprehu shqetësim të mërkurën në lidhje me pamjet video që tregojnë trajtimin e papërshtatshëm izraelit të aktivistëve të ndaluar të Flotiljes Global Sumud dhe kërkoi lirimin e tyre të menjëhershëm.
“Jam e tmerruar dhe e shokuar nga pamjet video të qarkulluara nga Ministri i Sigurisë Kombëtare i Izraelit, Itamar Ben-Gvir, në të cilat pjesëmarrësit e ndaluar në mënyrë të paligjshme të Flotiljes Globale Sumud, përfshirë qytetarë irlandezë, nuk po trajtohen në asnjë mënyrë me dinjitetin ose respektin e duhur”, tha Helen McEntee në një deklaratë.
Videoja e postuar nga Ben Gvir tregonte aktivistët të gjunjëzuar me duart e lidhura pas shpine dhe me ballin në tokë.
