Isufi në emisionin “Ditari” në Tëvë1, tha se masat që i ka ndërmarrë Qeveria janë një lëmoshë ndaj qytetarëve të vendit.
“Konsiderojmë se Qeveria është vonuar sa i përket angazhimit për stabilizimin e gjendjes në Kosovë për shkak të ngritjes së çmimeve, masat të cilat janë ndërmarrë kanë qenë kryesisht të një lëmoshe ndaj qytetarëve të Kosovës. Masa të tilla të cilat nuk janë ndërmarrë duke ditur se kriza po ndodh, si në aspektin ekonomik të asaj të energjisë dhe gjendjes së qytetarëve”, tha ai.
Ndërkaq, sa i përket projektligjit për përcaktimin e çmimit maksimal të produkteve, Isufi deklaroi se Qeveria duhet t’i obligojë deputetët e vet së pari për ta votuar e jo të presin nga opozita për kuorum.
“Kjo qeveri po tregon për çmimet të cilat kanë qenë dhe cilat janë tani, por nuk është qeveria për të konstatuar, por për të marrë veprime, sa i përket ligjit që po duan ta ofrojë Qeveria e Kosovës, atëherë ata kanë 51% të pjesëmarrjes në Kuvend dhe duhet t’i obligojnë deputetët e vet së pari që të jenë ata të cilët i bazohen në vendimet e qeverisë dhe jo të presin që opozita t’ua bëjë kuorumin”, theksoi Isufi.
Sot në seancën e Kuvendit, nuk ka kaluar në lexim te parë projektligji i propozuar nga Qeveria, për masat e përkohshme të produkteve bazë, kjo pasi nuk pati kuorum. /Teve1.info/
